септември 28, 2022

Кина вели НАТО го дестабилизира светот?


Кинеската мисија во Европската Унија соопшти дека НАТО е тој што ја дестабилизира меѓународната безбедност, пренесуваат кинеските државни медиуми.
Во соопштението се наведува дека она што го прави Кина е „во спротивност на обидите за разгорување на огнот и долевање масло на огнот, како што прават некои организации“, бидејќи добро е познато дека НАТО му испраќа оружје на Киев откако почна конфликтот на Русија и Украина.
Кинеската мисија во ЕУ, по повод изјавата на генералниот секретар на НАТО Јенс Столтенберг дека Кина не сака да ја осуди руската агресија, истакна дека „од избивањето на украинската криза Кина постојано задржува објективен и чесен став, останува посветена на промовирање мировни преговори и вложува позитивни напори за деескалација на ситуацијата“.
Кинеската мисија во ЕУ оцени дека НАТО е остаток од Студената војна и дека „не само што пропушти да размисли за својата улога во модерниот свет, туку и продолжи да го шири својот географски обем и опсегот на операциите и сè повеќе цели на Кина“.
„Ова е сериозен предизвик со кој се соочуваат глобалните мир и безбедност“, се наведува во соопштението.