октомври 1, 2022

Американскиот сенатор Марфи:Бугарија не смее да застане на патот на Македонија кон ЕУ

Катастрофа е ако не можеме да обезбедиме напредок и дозволиме Бугарија да застане на патот на Северна Македонија кон Европа, изјави денеска сенаторот од американската сојузна држава Конектикат, Крис Марфи, на сослушувањето за Западен Балкан во Сенатската комисија за надворешни работи.

Тој побара САД да одиграат активна улога во процесот на преговорите меѓу двете држави, како и да и стават јасно до знаење на Бугарија дека е во нејзин интерес, како балканска држава, да осигура дека има пат кон ЕУ за Македонија и Албанија, јави денеска „Гласот на Америка“.

-За мене е катастрофа ако не можеме да покажеме напредок кон Европа. И зошто би дозволиле една држава да застане на патот?, рече Марфи и го праша специјалниот претставник на Стејт департментот за Западен Балкан Габриел Ескобар, што САД би можеле да направат повеќе за да се тргне бугарското вето, и дали разговорите меѓу двете нови влади ќе дадат резултати.
Ескобар, претходно, нагласи дека Македонија и Албанија направиле значајни реформи и платиле висока цена и заслужуваат да напредуваат во процесот на пристапување.

Тој рече и дека САД се обидуваат да осигураат балканските држави да останат стабилни и заштитени од какво било злонамерно влијание од Русија и Кина.

-Она што Русија се обидува да го постигне, е да создаде ранливост во евроатлантскиот простор. Тие најдоа партнери во одредени земји кои се подготвени да помогнат во унапредувањето на тие цели за да не` оддалечат од други прашања, рече меѓудругото Ескобар.